Chin Bethel Church

Nykærsvej 7, 6900 Skjern

Denmark

Khrihfabu Tuanbia Tawi

Chin Bethel Church cu April 02, 2004 ah Chin miphun hna ralzam dirhmun in Denmark ram arak phan i Grindsted, Ølgod, Årre le Krogager ti mi khua 4 ah a um mi hna nih rak dirh mi a si. Hi khua 4 ah a phan mi hna cu an zapi te ti awk in Grindsted khua vok thahnak sehzung ah rian an rak tuan. An riantuannak sehzung cu akong tampi ruang ah khar a rak si caah October 3, 2006 ah Chin mi zeimawzat umnak le rian tuannak a si mi Sæby khua vok thahnak sehzung ah rian tuan pehzulh ding in minung 60 nih an rak thial tak hna. 

Atang mi Khrihfabu chungtel hna cu zarh hnih dan ve ve in Lutheran Biakinn Ølgod khua ah le Lutheran Mission Biakinn Skjern khua ah zarhpi ni phumhnak cu rak ngeih a si. Hi bantuk in Biakinn pumhnak kong ah harsatnak rak ngeih a si caah Khrihfabu chungtel hna nih mah te in Biakinn le pumhnak hmunhma kan ngeih khawhnak ding ca tiah Building Committee cu bupi meeting biachahnak in 2010 ah khan kan rak ser. 

Cuticun caan ahung kal leng mang i Skjern khua i zarhpi ni kan i pumhnak Lutheran Mission Biakinn nih hmaizarh (July zarh dongh 2011) tiang lawng nan i pum kho cang lai an kan ti tik ah thla fakpi in kan cam mi Pathian nih kan thlacamnak a kan let ruang ah pumhnak hmunhma thar kan hmuh mi Skjern khua sianginn hlun (skjern gammle byskolen) a rak si mi hall pakhat ah August 2011 thawk in zarhpi ni fa te mah le hmunhma ngeih mi bantuk in zalawng te in kan i pum kho. 

Pathian nih a dawtnak le thluachuahnak rel cawk lo he Denmark ram Skjern khua ah a um mi Chin Bethel Church cu a kan um pi i kum 5 / 6 chung kan hung kal hnu ah atanglei ni le thla le kum sunglawi khun chinchiah awk a kan pek mi le hman ter mi hna cu Khrihfabu tuanbia tawi tialnak ah kan vun langhter. 

December 2010 ah Khrihfabu nih Emmanuel Cinzah cu Church Pastor caah lak a si.

20 July 2011 i Mariager khua Bapstiat Union Civui ah Chin Bethel Church cu an member sinak cohlannak le thluachuah peknak an kan ngeih  

2012 thawk in Baptist Børn og Ungdomsforening ah pehtleihnak kan rak ngei

April 2014 ah Chin Bethel Church kum 10 tlinnak Jubilee kan rak tuah

February 2015 ah Nykærsvej 7, 6900 Skjern ah um mi cu thil chiahnak kudawng cu Biakinn caah kan rak cawk

May 2015 ah Nubu hna nih an rak dir ka in kum 10 tlinnak an kan tuah piak

Thla 9 chung remh le ser a si hnu ah May 2016 ah Biakinn luhnak cu rak tuah a si

December 2016 ah Mino hna nih an rak dir ka in kum 10 tlinnak an kan tuah piak

February 2017 ah Church Pastor bawmtu caah Za Uk Lian cu Assistant Pastor ah lak a si

11 March 2019 ah COVID 19 zawtnak ruang ah Denmark ram pumpi mibu tonnak phih khar a si i Marh 17 zarhpi ni cu a voi 1 nak bik i pum kho lo in Khrihfabu nih Biakinn kan rak khar zarh a si

November 26, 2021 ah Pu Ram Za Cung nih hi vawlei nunnak in a rak kan thih tak  

Khrihfabu kan cawlcanghnak le kan i tawlrelnak a tlam tlin chin chin khawhnak ding ca ti in a tu kan Biakinn pawng ah a um mi inn le hmun cu zapi hnatlaknak in cawk ding ti a si caah January 2022 ah i cawknak ding catlap cung minthutnak zong kan rak ngei. 

Theihternak: Khrihfabu tuanbia tawi kan rak langhter mi hi Chin Bethel Church kum 10 tlinnak Jubillee Magazine chung i ni, thla le kum caan sunglawi rak hman mi hna kha lak mi a si. 

Bawipa nih a kan dirh piak mi Chin Bethel Church tuanbia tawi a reltu nan dihlak te cung ah Pathian thluachuahnak um seh law amah sunparnak caah si ko seh.

Khrihfabu aiawh in…

Emmanuel Cinzah

Church Pastor